Første dag med «Open linje» var onsdag denne veka.

Når du no ringer sjukehuset skal du få raskt svar, og ved hjelp av enkle tasteval på telefonen kjem du til rett plass for hjelpa eller opplysningane du treng, skriv Helse Førde i ei pressemelding.

Raskare og betre

– Vi har god tru på at vi skal klare å gje pasientar og pårørande som ringer oss god og effektiv hjelp på telefonen, seier Laila Vilnes Helgheim som leiar prosjektet i Helse Førde.

– Det er rett og slett snakk om å gje dei som ringer betre service, ei betre kundeoppleving, legg ho til.

Bakgrunnen for satsinga er at telefontenestene har vist seg å vere svært utfordrande i sjukehusa. Visste du at tre av ti som ringer poliklinikkane i Helse Vest, ikkje får svar?

– Vi veit at mange pasientar og pårørande har opplevd lang tid i telefonkø og varierande grad av service, skriv Helse Førde.

Kontaktsenter

Dette ønsker dei no å få slutt på, og løysinga dei har valt heiter kontaktsenter.

– Dette blir ei tverrfagleg telefonteneste der seks avdelingar / klinikkar ved Førde sentralsjukehus og to ved Nordfjord sjukehus er representerte i pilotprosjektet. Dei som svarer sit i same rom, og kan svare på spørsmål rundt sjukehustimen din eller hjelpe deg med å endre på timen. Medarbeidarane i kontaktsenteret har erfaring frå både sentralbord og klinikkane, og skal jobbe tett saman for å gje dei som ringer best mogleg service, skriv Helse Førde.

Lettare for pasientar og pårørande

– På denne måten vil vi kunne gjere det lettare for pasientar og pårørande å komme gjennom på telefonen, gje dei betre hjelp ved å samarbeide på tvers, seier Laila Vilnes Helgheim.

Ho legg til at dei på same tid håpar å avlaste poliklinikkane for telefonar, slik at dei får mest mogleg tid til å ta seg av pasientane som kjem.

Desse tastevala får du:

Pasient eller pårørande som ringer får velkomstmelding og desse tastevala: «Tast 1 – spørsmål om time/tilvising, tast 2 – endring av time/avbestille time, tast 3 – medisinske spørsmål, tast 4 – andre spørsmål».